(Mohon maaf sebelumnya kepada sidang pembaca kalau tulisan berikut banyak menggunakan bahasa Samarinda, silahkan mencari pendamping penerjemah jika diperlukan… heheh).

Awal kesah ulun ini, tersebutlah suatu kampung bengaran kampung Selili yang masih beparakan jua lawan kota Samarinda. Nengkaya ini sambung kesah bubuhannya nang pina mandah itu ;

Tompel : … (hengap-hengap duduk memaraki Sandi nang lagi duduk benjuntai batis kebanyu diatas batang dipelabuhan Selili hari itu).

Sandi : kenapa pulang ikam ini Pel pina keuyuhan nengkaya habis mehaga itik bekunyung ?

Tompel : aku hanyar limbah mendatangi urang acara tadi diwadah pak RT kita, rami tadi urang disitu bekesah kita handak memilih calon gubernur Kaltim nang hanyar.

Sandi : uma ae haratnya ikam lah kada mau ketinggalan berita jua rupanya.

Tompel : harat nang apa, aku kada paham kesah urang disitu tadi.

Sandi : nah ham, apanya nang ikam kada paham?

Tompel : masa Ndi ujar pak RT menipu itik dalam pilgub Kaltim kaina kada bulih itu adalah terlarang?

Sandi : terus apa lagi ujar pak RT nang ikam dangar?

Tompel : amun sampai ada nang menipu itik maka urusannya bisa sampai ke pulisi ujar sidin?

Sandi : ah kada masuk akal Pel ae ujar ikam itu.

Tompel : itu jua Ndi ae, kada masuk akal ku jua. (Cuma si Tompel ini urangnya tetulian)

Haratan asik bekesahan Tompel wan sandi ini, Julak Doja rupanya asik jua mendangarkan kesah bedua nengini, lalu ae memaraki… (maka lanjut kesah ulun ini lah)

Julak Doja : aku ini sudah rancak umpat pemilu Pel ae hanyar ini jua mendangar menipu itik nang ujar ikam itu. Amun membari duit ke pemilih itu nang kada bulih, tapi amun ketahuan pang… hahaha

Tompel : (pina takajut melihat Julak Doja beparak)…

Sandi : bujur tu Julak Doja ae amun membari-bari duit ke pemilih itu nang ulun tahu kada bulih. (sambil mikir kada 7 keliling pang, tapi matanya nang kesana kemari mencari kalau pina telihat ada bebinian mandi pinggir sungai situ)

Julak Doja : membari duit ke pemilih itu istilahnya wayahni jaman now ini manipolitik. (money-politic tulisannya)

Sandi : naaaahhh… mungkin manipolitik itu kalo nang ikam danger menipu-itik

Tompel :…. (begaruk kepala masih kada paham)

Julak Doja : sini telinga ikam Pel beparak… Ndi coba ikam ulangi nang nyaring.

Sandi : Money-Politic dibaca manipolitik… Tompel ini nang didangarnya menipu - itik.. aahhh

(money-politic dibaca manipolitik… manipo-litik… menipu-itik, maklum pendangaran Tompel manipo didangarnya menipu… litik didangarnya itik)

Julak Doja : makanya Pel ae telinga itu dipasang amun urang lagi menjelaskan… byurrr (muyak Julak Doja ditunjulnya sampai tecabur sekalian Tompel nang masih kebingungan itu… tau sorang sungai di Selili kalo’ banyak banar jebakan betmen nang hanyut disitu)

Sandi : (masih haja kesana kemari matanya beharap kalo pang ada bebinian nang mandi di sungai parak situ).